Chi sione?

La coprativa soziala inout

La sociazion INOUT la nasc tel 2017 per ge dèr lèrga e sostegn a idee e scomenzadive oute ai jogn, che le à de besegn de sostegn aministratif e de endrez.

L grop, dut de jogn e jones dai 18 ai 35 egn, l se dèsc l zil de doentèr pont de referiment per l mond di jogn fascegn, “bérstot” de stimol e ispirazion e de proponeta e metuda en esser de projec ouc a chesta pèrt de noscia comunanza.

INOUT vel meter en luster i talenc e le idee di jogn del teritorie, con tel cef etres doi gregn obietives: esser sostegniboi da n pont de veduda ambientèl e la valorisazion del lengaz e la cultura ladina.

Da mé del 2019 la sociazion l’à lascià lèrga a la neva Coprativa Sozièla INOUT. La comunanza de Fascia l’à ades a la leta na realtà segura dal pont de veduda aministratif, averta e piena de gaissa, vertìa per ge dèr spenta a l’estro e al ferstont di jogn fascegn, e a strenjer leames te anter de ic, l teritorie e l mond.

L’inom

INOUT per ladin vel dir “delvers”, “polito”. Cognoscer zeche inout vel dir l cognoscer franch. Nosc grop l se tol dant de lurèr “inout”, percheche per nos l’é “i detaies che fèsc la desferenza”.

Fort ence l leam de l’inom co l’engleis: IN-OUT. Un de nesc prumes zii l’é de far rei delaite de la comunanza fascèna, per se relazionèr dò e dò col mond. Volon che nesc talenc dal post i fioresce, che i posse fèr garatèr sie potenzialità e che i le doure per fèr vèlch de real, per sie ben personal, ma ence de la comunanza e del teritorie.

Tel lejer l’inom per engleis, in aut, vegn fora ence n nef segnificat per ladin: apontin, en aut, en su. INOUT la varda en su, la mira en aut, restan semper leèda con reijes fones a sia val.

L logo