Circensema

Circensema

(da circen, circense e ensema, insieme)

Beze e bec, Sciori e Sciore: aon chiò l Circo de Fascia!

Balote, zogn e malans i ciapa l sgol da le man de chisc joegn artisć, per maravear gregn e picoi. Matitade acrobatiche e ciampilote per aria te n spetàcol pien de emozion. Jogolar doenta strument de agregazion e ocajion de condivijion.

Storia

L grop fascian l é nasciù tras l amor per l circo del maester de la Scola de Circo Bolla di Sapone de Trent Tommaso Brunelli. I joegn jogolieres ti egn à proà e miorà le desferente tecniche e discipline tolan part a evenc a livel nazional (Brianza, ACDC, Convention del Triveneto) e a workshop con artisć profescionisć (Paolo Piludu, Sandra Morandell, Chris Patfield, Francesca Mari, Federico Benuzzi, Riccardo Pagnin). I joegn acrobac fascegn à fat spetacol te desferente ocajion tel Trentin e te la Talia (Circus Spring, Festa dei Giovani, Roma Buskers Festival e muie amò…).

Atività

Meton dant spetàcoi da teater e da piaz, laboratories de jogolerìa per bec e gregn, animazion a feste e evenc, corsc e projec per chi che vel emparar a jogolar co noi.

SunSom-In Vetta

Circensema se n arloea te so habitat natural, en cordada anter i monc, na endesfida al catif temp e a n muion de contratempes. N spetacol de circo dut da se goder, che ciapa e energich. Tecnica e grignade, n varech do l auter, per proar a arjonjer l obietif: saral bon l grop de jogolieres zenza tema de ruar fin Sunsom?

Circenshow

L Circenshow, portà dant per la pruma outa al Roma International Buskers Festival 2022, l é n spetacol poliedrich che met en luster le potenzialità e la tecnica de vigni jogolier de Circensema. L é n maraveous viac a descorir le desferente art del circo: n’armonia de numeres che muda dò e dò te n tormen de emozion, toc da grignar e da se sperder ma che sa ence tociar l cher. Endana l Circenshow i joegn jogolieres jia con legreza e a na vida lijiera mudan art anter balote, malans, rodesoule, cheie, cugole da contat e fech.

Chiò podede veder l dossier de nosc spetacol con soa scheda tecnica.

Chiò podede veder l trailer nosc spetacol SunSom-In Vetta.

Fora per l istà l grop endreza l festival de Circo più aut de la Talia, l CIRCEN DOLOMITES FESTIVAL.